د طالبانو ویاند ذبیحالله مجاهد وایي، د پاکستان پوځ تېره شپه ناوخته د هېواد پر درېیو ولایتونو خوست، کونړ او پکتیکا هوایي بریدونه کړي چې له امله یې یوه مېرمنه او ۹ ماشومان وژل شوي دي.
نوموړي د سېشنبې په ورځ (د لېندۍ ۴مه) پر اېکس پاڼه لیکلي، د پاکستان پوځ د خوست د ګربز ولسوالۍ په مغلګۍ سیمه کې د ملکي کسانو پر کور برید کړی چې له امله یې یاد شمېر کسان وژل شوي دي.
هغه بیا په کونړ او پکتیکا کې د شویو بریدونو په اړه معلومات نهدي ورکړي. مجاهد زیاتوي، چې په وژل شویو ماشومانو کې پنځه یې هلکان او څلور نورې نجونې دي.
د هغه په خبره: «تېره شپه د شپې ۱۲ بجې د خوست ولایت د ګربزو ولسوالۍ مغلګۍ سیمه کې پاکستاني متجاوز پوځ د یو تن ملکي ځایي اوسېدونکي ولایتخان ولد قاضيمیر په کور بمبار وکړ، چې له امله یې ۹ ماشومان (۵ هلکان او ۴ نجونې) او یوه ښځه شهیدان شول او کور یې ویجاړ شو.»
د پاکستان د پلازمینې اسلاماباد په ارجنتینا پارک کې سلګونه داسې افغان کورنیو، خبریالانو او د بشري او ښځو د حقونو فعالانو شپې او ورځې تېرولې، چې د کورونو مالکانو د ویزې د نهلرلو له امله له کرايي کورونو اېستلي و.
افغانستان انټرنشنل-پښتو ته په رالېږل شویو ویډیوګانو کې لیدل کېږي، چې پولیس په ډېره تاوتریخجنه بڼه د افغانانو له لوري جوړې شوې کېږدۍ ورانوي او پهکې مېشتې کورنۍ له یوې مخې نیسي او موټرو ته یې لېږدوي. له دې سربېره پولیسو د ښځو په ګډون ځينې کسان وهلي ډبولي هم دي.
په دغو ویډیو ګانو کې پولیس وايي: «موږ تاسو یوه مناسب ځای ته لېږدو.» خو لا تر اوسه په کره توګه روښانه نهده، چې دغه کورنۍ چېرته لېږدول شوي، خو پولیس هر افغان چې نیسي نو د حاجي کمپ په نوم او یا دې ته ورته مرکزونو ته د بایومتریک لپاره لېږدوي او تر هغې وروسته یې افغانستان ته په زوره شړي.
افغانستان انټرنشنل-پښتو ته په رارسېدلو ویدیوګانو کې لیدل کېږي، چې په دغو نیول شویو کسانو کې له ښځو سربېره ماشومانو او سپينږیري هم شامل دي.
له دې سره سم، د نن ورځې (دوشنبه د لیندۍ ۳مه) په اوږدو کې د اسلاماباد او راولپنډۍ په شاوخوا سیمو کې د پولیسو له لوري ورته چاپې وهل شوي او د خبریالانو او مدني فعالانو په ګډون لسګونه نور کسان هم نیول شوي دي.
د راولپنډۍ د یوه ښارګوټي اوسېدونکو افغانستان انټرنشنل ته ویلي، چې پولیسو نن سهار پر څو بلاکونو چاپه وهلې او د ځینو کورونو د دروازو په ماتولو سره پهکې مېشتې افغان کورنۍ نیولي او افغانستان ته د لېږدونې مرکزونو ته لېږدولي دي.
په پاکستان کې مېشت یو شمېر افغانان د پاکستان له حکومت څخه په کلکه غواړي، چې د نړۍوالو اصولو او قوانینو لهمخې ورسره چلند وکړي او له زورزیاتیو لاس واخلي.
دوی همداراز د ملګرو ملتونو د کډوالو او بشري حقونو سازمانونو څخه غواړي، چې په پاکستان کې د افغان کډوالو پر وړاندې د پولیسو د ناوړه چلند مخنیوی وکړي.
