د پښتونخوا د ملي عوامي پارټۍ مشر وايي، هغه د ټولو هېوادونو سفیرانو ته لیکونه لېږي او له نږدې ورته څرګندوي: «تاسو چې د دې بېاستازي حکومت سره تړونونه کړي، دا د پاکستان خلکو ته د منلو نه دي.» هغه زیاته کړې، د نړۍ خطرناک هېوادونه غواړي دغه سیمې د معدني زېرمو لپاره د جګړې ډګر وګرځوي.
محمود خان اڅکزي د چهارشنبې په ورځ (د لړم ۲۱مه) پر اېکس پاڼې لیکلي: «زموږ واکمنان د عقل په ازموینه کې دي او دوی هېڅ عقل نه لري.»
د نوموړي په خبره، د نړۍ خطرناک هېوادونه غواړي چې دا سیمه د معدني سرچینو لپاره د جګړې ډګر کړي.
هغه دغه راز ټينګار کړی، چې د ټولو هېوادونو سفیرانو سره به وګوري او په واضیح ډول به ورته ووايي، چې د پاکستان تړونونه لغوه کړي.
اڅکزي زياته کړې: «موږ پرېکړه کړې چې د ټولو هېوادونو سفیرانو ته لیکونه ولېږو، له نږدې به ورسره ووینو او په واضیح ډول به ورته ووایو، کوم هغه تړونونه چې تاسو د دې بې استازي حکومت سره کړي، د پاکستان خلک به یې ونه مني.»
هغه د پاکستان حکومت ته خبرداری ورکړی: «که تاسو غلا وکړئ، زموږ ماشومان ووژنئ، زموږ خوېندې او لوڼې بې عزته کړئ، نو موږ به هم پر تاسي ژوند حرام کړو.»
نوموړي ویلي، چې پاکستان جمهوریت غوښتونکی دی؛ خو د رایو د غلو ملاتړ کوي.
هغه د راتلونکې جمعې په ورځ د ټولو ګوندونو سره یو ځای د لاریونو خبر ورکړی.
په اسلاماباد کې د تېرې ورځې له ځانمرګي برید یوه ورځ وروسته، د پاکستان لومړي وزیر شهباز شریف د دې هېواد په پارلمان کې هند او افغان طالبان د پاکستان په ترهګریز برید کې پر لاس لرلو تورن کړل.
هغه هند ته د طالبانو د بهرنیو چارو د وزیر سفر له دغه هېواد سره د طالبانو د همکارۍ نښه وبلله او ویې ویل، چې ډیلي ته د امیرخان متقي سفر پاکستان ته یو څرګند پیغام ورکوي.
نوموړي دغه څرګندونې وروسته تر هغه وکړې، چې د سې شنبې په ورځ (د لړم ۲۱مه) یوه ځانمرګي بریدګر په اسلاماباد کې د محکمې مخې ته ځان ته چاودنه ورکړه، چې له امله یې شاوخوا ۴۰ کسانو ته مرګژوبله واوښته. د پاکستان د کورنیو چارو وزیر وویل، چې بریدګر غوښتل محکمې ته ننوځي، خو بریالی نه شو او د پولیسو موټر ته څېرمه یې ځان ته چاودنه ورکړه.
له دې سره، وسلهوالو د سې شنبې په ورځ په سوېلي وزیرستان کې د واڼې پوځي کالج پر وړاندې برید وکړ، چې له ساتونکو سره له څو ساعتونو نښتې وروسته په برید کې درې کسان ووژل شول.
د پاکستان د کورنیو چارو وزیر محسن نقوي وویل، چې بریدګر په افغانستان کې له خپلو تنظیموونکو سره په اړیکه کې وو. نن د پاکستان لومړي وزیر شهباز شریف هم اعلان وکړ، چې د بریدګرو په منځ کې افغانان هم شامل دي.
هغه دا برید په ۲۰۱۴ کال کې د پاکستان د پوځ له خوا اداره کېدونکي ښوونځي کې د قتل عام سره پرتله کړ او ټینګار یې وکړ: «د افغانستان د پلونو نښې هم لیدل کېږي. »
هند په یوې رسمي اعلامیه کې په دې بریدونو کې لاس لرل رد کړل. طالبانو هم په پوځي اکاډمۍ او د اسلام اباد په محکمې برید وغانده. طالبانو په وار وار ویلي، چې د پاکستاني طالبانو د تحریک ډلې او بلوڅ وسله والو بریدونه د پاکستان داخلي ستونزه ده او د دغه هېواد حکومت دې دغه پړه پر طالبانو نه اچوي.
د هند له خوا د تورونو د ردولو په اړه د پاکستان لومړي وزیر وویل: «موږ په بلوچستان کې د جعفر اېکسپرېس د اورګاډي تښتولو شواهد نړۍ ته وړاندې کړل. «ټيټيپي» او بلوڅ بېلتون غوښتونکو د افغانستان له خاورې فعالیت کاوه او هلته د ترهګرو او په هند کې د هغوی له ملاتړو سره په اړیکه کې وو. موږ خپل شواهد نړۍ ته وړاندې کړل او هېچا یې رد یا ننګونه ونه کړه.»
هغه زیاته کړه: «دا ګومان کول چې د پاکستان ترهګر دوښمنان په دې بریدونو کې ښکېل نه دي، په دې معنا ده چې شپه، ورځ وګڼو.»
د پاکستان لومړي وزیر وسله والو ته خبرداری ورکړ: «موږ ستاسو د کړنو څخه په بشپړه توګه خبر یو، موږ دمخه مناسب ځواب ورکړی، بیا به هم دا کار وکړو.»
شریف په ترکیه کې له طالبانو سره خبرو اترو ته په اشارې سره وویل، چې پاکستان یوازې یوه غوښتنه لري: هغه دا چې طالبان دې ترهګرې ډلې چې د افغانستان له خاورې څخه په پاکستان برید کوي، کنټرول کړي.
هغه ټینګار وکړ: «موږ سوله غواړو او افغانستان یو مساوي شریک ګڼو؛ هغه څه چې د پاکستان لپاره ښه دي، د افغانستان لپاره هم ښه دي، خو غلطې ژمنې او د ترهګرو په مخنیوي کې پاتې راتلل د منلو وړ نه دي.»
شهباز شریف دا هم وویل: «هند ته د افغانستان د بهرنیو چارو وزیر سفر او ورپسې سفرونه موږ ته روښانه پیغامونه راکوي. موږ به ترهګرو ته اجازه ورنکړو چې د پاکستان د پرمختګ او سوکالۍ مخه ونیسي.»
هغه پر طالبانو غږ وکړ، چې له پاکستان سره د سولې په ټینګښت کې همکاري وکړي.
د سريلانکا د کرېکټ ملي لوبډلې لږ تر لږه اته لوبغاړي، پرته له دې چې د «پاکستان او زمبابوې» سره درې اړخیزې سیالۍ ترسره کړي، له پاکستان څخه وتلي دي. دا پرېکړه د سې شنبې په ورځ په اسلاماباد کې له هغه ځانمرګي برید وروسته وشوه، چې په کې ۱۲ کسان ووژل شول.
د فرانس پرېس خبري اژانس د چهارشنبې په ورځ (د لړم ۲۱مه) راپور ورکړی، چې د سريلانکا د کرېکټ لوبغاړو د امنیتي اندېښنو څرګندونه کړې ده. ټاکل شوې وه، چې د دې هېواد ملي لوبډله سبا د پاکستان پر وړاندې ولوبېږي، خو دا لا روښانه نه ده، چې د دوی ګډون به په سیالیو کې دوام وکړي او که نه.
د سريلانکا د کرېکټ فدراسیون ویلي، چې دوی د یوې رسمي اعلامیې پر چمتو کولو بوخت دي، څو د سیالیو د دوام په اړه خپله پرېکړه اعلان کړي.
د پاکستان د کرېکټ بورډ هم له چاودنې وروسته اعلان کړی، چې د مېلمه لوبډلې سريلانکا د امنیتي تدابیرو کچه یې لوړه کړې ده. ویل شوي، چې پاتې سیالۍ به د پلان له مخې په راولپنډۍ کې ترسره شي.
د پاکستان د لوبغاړو د امنیت اندېښنې اوږده سابقه لري؛ د ۲۰۰۹ کال په مارچ کې د سريلانکا د کرېکټ شپږ لوبغاړي هغه وخت ټپیان شول، چې د لاهور په قذافي لوبغالي ته روان وو او وسله والو پرې برید وکړ. دغه پېښه د دې لامل شوه، چې نړۍوالې لوبډلې نږدې یوه لسیزه له پاکستان څخه د سفر او لوبو کولو ډډه وکړي.
د طالبانو د افغانستان بانک د نظارت او مالي خدمتونو عمومي امر لطفالله خیرخواه اېمل ولي خان ته په خطاب کې ویلي: «زه تاسو ته مشوره درکوم چې په پوره غور سره فکر او تحلیل وکړئ.» اېمل ولي خان تر دې وړاندې ویلي و، چې افغان طالبان د افغانانو اصلي څېره نه دي.
لطفالله خیرخوا د چهارشنبې په ورځ (د لړم ۲۱مه) پر خپلې اېکس پاڼې د اېمل ولي خان وروستی پوسټ شریک کړی او ورته یې لیکلي: «له مخکې جوړو شویو اندېښنو او قضاوتونو څخه ځان وساتئ.»
د خیرخوا په خبره، د اېمل ولي خان خبرې مناسبې نه دي او ټولې خبرې یې د مخکېنیو قضاوتونو او جدي فکري پایلو پایله ده.
د عوامي نشنل ګوند مشر اېمل ولي خان وايي، دا د منلو نه ده چې افغان طالبان دې د افغانستان د ولس اصلي استازیتوب وکړي او نه هم ټيټيپي او پيټيای د پښتونخوا د خلکو نمایندګي کوي. نوموړی زیاتوي، چې دغه ډلې او تحریکونه د لوېدیځ جوړې شوې پروژې دي.
د پاکستان د خلکو ګوند مشر بلاول بوټو زرداري د دغه هېواد پارلمان ته په خبرو کې ویلي، چې له «ترهګرو سره د مبارزې» لپاره باید د خلکو استازي، حکومت، اپوزیسیون او سیاستوال سره یو موټي شي. نوموړي ویلي، چې پاکستان لا له وړاندې ترهګرو ته ماتې ورکړې.
بلاول بوټو زرداري د چهارشنبې په ورځ (د لړم ۲۱مه) د پاکستان په پارلمان کې ویلي، چې په دغه هېواد کې ټول سیاستوال، حکومتي مامورین او د خلکو استازي باید خپلمنځي اختلافات پرېږدي.
هغه ویلي: «که سره یو نه شو، ترهګر يو ځل بيا سر راپورته کوي، خو د شکر خبره دا ده چې پاکستان لا دمخه دغو ترهګرو ته ماته ورکړې ده.»
بوټو د خپلو خبرو په ترڅ کې همداراز ویلي، په خپله خاوره کې یې داسې کار کړی چې ناټو او ټولې نړۍ په افغانستان کې نه و کړی.
هغه د خبرداري په ډول وویل: «که خدای کول نو بيا به هم موږ هغوی ته (ترهګرو) ماتې ورکړو.»
دا په داسې حال کې ده، چې په دې وروستیو کې په پاکستان کې ناامنیو زور اخیستی. تېره ورځ د پاکستان د پلازمېنې په جي ۱۱ سیمه کې د یوه ځانمرګي برید امله ۱۲ کسان ووژل شول او نږدې ۳۰ کسان ټپيان شول.
د پاکستان د دفاع وزیر د طالبانو د اقتصادي مرستیال ملا عبدالغني برادر د څرګندونو په غبرګون کې ویلي، چې د پاکستان او افغانستان ترمنځ د سوداګریزو اړیکو کمول به اسلاماباد ته ګټه ورسوي. هغه وویل، چې له افغانستان سره د اقتصادي اړیکو پرې کېدل به پاکستان ته هېڅ ډول زیان ونه رسوي.
ملا عبدالغني برادر د چهارشنبې په ورځ پر افغان سوداګرو غږ وکړ، چې له پاکستان سره ټولې سوداګریزې اړیکې ودروي. خواجه اصف په ځواب کې وویل: «دا د افغانستان داخلي مسله ده، که دوی د توکو د واردولو لپاره د ایران، ترکیې، ترکمنستان یا ان د هند لارې هم کاروي، مونږ لپاره هېڅ توپیر نه لري؛ ځکه چې دا پرېکړه پاکستان ته کوم اقتصادي زیان نه رسوي او ان موږ ته ارامي هم راکوي. »
هغه زیاته کړه: «د کراچۍ له بندر څخه د افغانستان لپاره د وارد شویو توکو یوه برخه بیا هم پاکستان ته راستنېږي. د افغانانو له خوا د نورو لارو غوره کول زموږ لپاره اقتصادي ګواښ نه دی.»
د پاکستان د دفاع وزیر ټینګار وکړ: "د دواړو هېوادونو ترمنځ د ترافیکو کمول به د سوداګرۍ یا په بله پلمه پاکستان ته د ترهګرۍ ننوتل کم کړي. په دې حالت کې به زموږ لپاره د سرحدونو اداره کول اسانه شي. دا پرېکړه په حقیقت کې په پټه یو نعمت دی؛ ځکه چې که افغانستان نورې لارې غوره کړي، نو دا به پاکستان ته ګټه ورسوي، نه دا چې زیان ورسوي."
ملا عبدالغني برادر نن له افغان سوداګرو وغوښتل، چې له پاکستان سره سوداګري ودروي او بدیلې لارې غوره کړي.
هغه وویل: "ټول افغان سوداګر او صنعتکاران باید د پاکستان پر ځای نورې سوداګریزې لارې غوره کړي. زه له دوی څخه غوښتنه کوم چې ژر تر ژره د وارداتو او صادراتو لپاره بدیل لارې ولټوي."
ملا برادر خبرداری ورکړ، چې د درې میاشتني ضرب الاجل وروسته هر هغه سوداګر چې له پاکستان سره سوداګرۍ ته دوام ورکوي، د طالبانو د حکومت له همکارۍ څخه به محروم شي او د هغه غږ به نه اورېدل کېږي. هغه له پاکستان څخه د وارد شویو درملو کیفیت هم ټیټ وباله او ویې ویل، چې افغان سوداګر یوازې درې میاشتې وخت لري چې له پاکستان سره خپلې درملیزې معاملې پای ته ورسوي.